Alltaf gott að fá sér einn og svo út að hlaupa

Það virðist vera sama hvað um er rætt, regluleg líkamsrækt er oftast nefnt sem svona hliðarathöfn við eitthvað sem er gott. Herbalife, Hydroxycut og hvað sem allar þessar megrunar- og heilsuvörur heita koma alltaf með þeim leiðbeiningum að þau virki undravel svo lengi sem maður bara breyti mataræði og hreyfi sig reglulega. Þetta er svona naglasúpusyndróm. Þarf bara einn nagla í hörkusúpu...svo lengi sem þú bætir við kjöti, grænmeti, kryddi o.s.frv. Ég tók upp á að hugsa aðeins betur um mataræðið og stunda reglulega hreyfingu fyrir 2ur árum og árangurinn er heilmikill. Sleppti alveg þrautmarkaðssettum töfralausnum og notaði bara hliðarathafnirnar.

En minna en sjö glös af víni á viku, það er forsendan. Athugið að nefnt er vín, ekki brenndir drykkir eða bjór. Ætli myndin skekkist mikið ef notað er annað en vín? Eitt vínglas á dag er mjög lítið magn af vínanda. Hvernig ætli það sé annars fylgst með 12.000 manns á 20 árum? Ef meðaltalið hjá þeim var eitt glas á dag þýðir það 87,600,000 vínglös. Það er mikil vínsúpa.

Áfengi í hófi getur verið heilsusamlegt

Að græða aukatíma

Nú er gríðarlegt tækifæri í augsýn. Tækifæri sem ekki kemur aftur fyrr en eftir fjögur ár.

Málið er nefninlega að nú er nýhafið hlaupaár. Það þýðir að við fáum heilar tuttuguogfjórar klukkustundir aukalega þetta árið beint upp í hendurnar. Þetta er auðvitað mikil kjarabót, sérstaklega fyrir jafn vinnuglaða þjóð og Íslendinga. Það má því búast við feitari tékka eftir þennan langa febrúarmánuð en síðustu ár.

Hvað á maður að gera við svona aukatíma ef maður er ekki vinnufíkill? Spurning hvort maður eyði honum í góðgerðarstarfsemi eða hreinlega dekri við sjálfan sig?

Það er nú einu sinni svo að margt er hægt að afreka á einum sólarhring. Þetta jafngildir tveimur tímum á hverjum mánuði ársin. Hálftíma á viku. Hvað er hægt að gera sniðugt á hálftíma sem við fáum alveg gefins?

Ég er að hugsa um að eyða þessum tíma í konuna mína en er veikur á svellinu. Hugsanlega fer þessi vikulegi hálftími bara í einhverja vitleysu. Eins og að skrifa tilgangslausa bloggfærslu. 

Þá fer þetta að skella á og stutt í áramót

Er að fara að demba mér í 10 ára hefð. Að horfa á National Lampoon's Christmas Vacation á aðfaranótt tuttugastaogfjórða. Það er bara eitthvað við þessa mynd sem kemur mér í jólaskapið. Rölti smá Laugaveg í kvöld. Ótrúleg mannmergð. Varla hægt að komast áfram.

Svo er það vinna í fyrramálið kl. 9 stundvíslega. Einn af fáum dögum sem maður lætur sig hafa það að mæta í jakkafötum. Ég á erfitt með að skilja þá pólitík á sumum vinnustöðum þar sem jakkafatabrúkun er skylda. Finnst það óttalega 20. aldarlegt.

 

 

 

 

Bið annars að heilsa öllum og vona að þið hafið það gott. Munið að slappa af, það vill gleymast. Verum hress og ...

 

 

...gleðileg bítlajól... 

Þykir nú bara nokkuð gott

Veit ekki með ykkur en það að aðeins 5% gesta sé undir lögaldri á barnum þótti nú bara frekar lítið í mínu ungdæmi. Finnst mér virðingarvert að starfsmenn Tropical hafi þetta góð tök á því að passa upp á aldurstakmarkið. Ég hef lúmskan grun um að mun stærra hlutfall sé af ólögráða ungmennum á mörgum börum miðbæjarins. Vona ég að eigendur Tropical hljóti sérstaka viðurkenningu lögreglu fyrir afar vel unnin störf.

Unglingadrykkja á Tropical

Maður spyr sig...

...af hverju munntóbak var tekið af markaði hér á landi fyrst það er hættuminna en tóbaksreykingar? Ég hef heyrt því fleygt að í kjölfar reykingabanns á skemmtistöðum séu jafnvel dannaðar dömur farnar að fylla skoltinn af tóbakspúðum til að þurfa ekki að hírast undir vegg með rettuna. Smygl á munntóbaki er talsvert og eru dósirnar seldar dýrum dómi á "svarta markaðnum" hér á landi.

Maður veltir því fyrir sér; af hverju var fínkorna tóbak bannað en ekki reyktóbak? Af hverju ekki reyktóbakið frekar og hinu hættuminna haldið . Hvenær ætli öll tóbaksneysla verði bönnuð í landinu?

Hver ætli taki þessar ákvarðanir?

Munntóbaki fylgir aukin hætta af völdum hjartaáfalla og heilablóðfalla

Trúarleg siðferðisklemma sem setur eilíft líf mitt í hættu

 Nú er ég í blússandi vandræðum!

 

Kona mín elskuleg segir að ég eyði meiri tíma í tölvuna en hana. Þetta er vont að heyra. Ég reyndi að segja henni að Guð leyfi mér ekki að liggja hjá henni meðan hún er á blæðingum! Hún er ekki að kaupa þessa skýringu. Nú stend ég frammi fyrir því að eiga tvo valkosti og "hvárki góðan" eins og segir í eddukvæðum. Lifa helvíti á jörðu undan brennandi augnaráði konu minnar elskulegrar, eða verða kastað í ystu myrkur andlegrar tilveru af réttlátum Guði mínum. Ég spyr því kæru bloggarar; Hvað á ég að gera???

Er hægt að treysta á bókstaf?

Margt hefur verið rætt í bloggheimum upp á síðkastið um kristna trú og trúfélög. Þar er ótt og títt vitnað til hinnar merku bókar Biblíunnar og sitt sýnist hverjum um trúverðugleika þeirrar heimildar. Er hægt að byggja rök sín á bókstöfum þeim sem sveipaðir eru svo skuggum fortíðar? Er hægt að leggja hreinan trúnað á sundurleitan bókfellsbunka, ritsafn ólíkra manna á ólíkum tímum?

Sagt er að Páll Postuli hafi ritað "af heilögum innblæstri". Þar sé um að ræða að rithönd hans hafi verið stýrð af Guði sjálfum. Það má vera, en hver er fær um að meta að svo sé. Hvernig getum við treyst dógreind og geðheilsu manna sem uppi voru fyrir svo löngu?

Þetta hljómar nú svolítið eins og Páll Postuli hafi jafnvel kannski, hugsanlega, verið undir áhrifum einhverra skynbreytandi lyfja eða efna, óvart eða viljandi. Þetta sannar bara enn frekar að Ritningin er skrifuð af mönnum en ekki Guði. Öll mannanna verk eru ófullkomin í eðli sínu og þar á meðal Ritningin. Það er afskaplega óábyrgt að treysta því blint að um tæran boðskap Guðs sé að ræða. Það er alltaf möguleiki á mistökum, það er bara þannig. Það er alltaf möguleiki á að eitthvað hafi misfarist í þýðingum, endursögn og túlkun fyrir utan það að alltaf er hægt að efast um geðheilbrigði og pólitíska ívilnun ritunarmanna.

Tökum dæmi. Nú ofsóttu Rómverjar kristna menn svo mjög að þeir stunduðu helgiathafnir sýnar í laumi. Margir kristnir misstu vini og ættingja í gin ljóna og fyrir sverðum skylmingarþrælanna. Meðal þessara sömu Rómverja naut samkynhneigð nokkurrar hylli og þótti meira en sjálfsögð meðal fyrirmanna og aðalsins. Er hugsanlegt að frumsöfnuðir kristninnar hafi sett svo mjög út á samkynhneigð því hún var óvinum þeirra töm? Er hugsanlegt að í frumkristni hafi þetta verið gert af pólitískum ástæðum? Er hugsanlegt að um hreina markaðssetningu hafi verið að ræða meðal trúboða á uppgangstímum kristninnar?

Burtséð frá mörgu góðu sem kristnin býður uppá er einfaldlega ekki hægt að kokgleypa textann sem skýran, upphafinn og óumdeilanlegan boðskap Drottins Guðs almáttugs. Það eru alltof margir búnir að vera með puttana í honum. Of mörgum spurningum er og verður ósvarað. Ég lít það alltaf hornauga þegar menn vitna til þessarar ritningar til að koma hinum og þessum skoðunum á framfæri. Ég get ekki annað en efast um heilbrigða rökhugsun slíkra manna.

Við erum að sjá þetta sama gerast ítrekað hjá hinum og þessum söfnuðum. Þeir lyfta einhverjum textabrotum og stökum orðfærum í hæstu hæðir en líta framhjá öðrum köflum í sömu andrá. Afleiðingarnar eru oft hræðilegar. Hver man ekki eftir t.d. Waco í Texas? Sjáið Guðmund í Byrginu. Sá einhver heimildamyndina Jesus Camp á RÚV nýlega?

Ég þigg með þökkum boðskap kristninnar um kærleika og umburðarlyndi manna á millum og læt mér það eitt nægja til þess að kalla mig kristinn. Ég tala við minn Guð í einrúmi og kæri mig kollóttan um hvort samkynhneigðir gifti sig í kirkju eða ekki. Slíkt má vera að sé áhlaup á kristnar helgivenjur og kirkjuhefðir, en þá það. Ég hef ekki trú á að það kollvarpi kristninni. Trú og trúarbrögð hljóta að þróast gegnum aldirnar. Alveg eins og tungumál, vísindi, þekking og flest allt í jarðneskri tilvist okkar.

Ps. Þessi skrif voru innblásin, hvað sem það nú þýðir :)

Samt ofnotað lyf

Ég er samt viss um að of mörg börn hér á landi eru sett á þetta lyf. Þessi þjóð virðist sólgin í skyndilausnir af þessu tagi. Lyfjagjöf hér á landi er ótrúlega mikil og erfitt að trúa því að við séum líffræðilega öðruvísi en annað fólk. Ég tek fram að vissulega eru til ofvirk börn sem koma vel út úr lyfjagjöf, en ég held að nauðsynlegt sé að beita atferlismeðferð með til að hámarka árangurinn og jafnvel hjálpa þeim að losna við lyfin fyrr en ella. En er þetta innlend frétt???

Segja lyfjagjöf við ofvirkni gagnslausa