Færsluflokkur: Bloggar

Brotalöm í hönd

I can see my house from here! Lítið hefur verið bloggað upp á síðkastið en það á sér eðlilegar skýringar. Ég álpaðist nefninlega til að framkvæma áhættusaman leik, stökkva á skíðum. Stökkið varð í sjálfu sér mjög gott, hátt og kraftmikið. Hins vegar varð lendingin ekki eins og best verður á kosið. Ég lenti nefninlega kylliflatur á andliti og bringu í harðfenninu. Við þetta splundraðist bein í hönd, brákuðust tvö rifbein, sprakk vör, rispaðist hálft andlitið og losnuðu tvær tennur. Þegar ég rankaði úr rotinu stuttu síðar þurfti ég að fara í aðgerð á hönd og hef verið með þá hægri í gipsi s.l. 4 vikur. Sannkölluð brotalöm í hönd. Blóm og kransar afþakkaðir en stöku tissjú velkomið.

Staða konunnar...

Goti viðrar spúsu sína ...er bersýnilega í bandi við hlið "eiganda" síns skv. þessum ágætu Gotum. Maður veltir fyrir sér hvað Sóleyju Tómasdóttur fyndist nú um þetta? Ég er ekki hissa á að blessuðum Gotanum hafi þótt þetta sérkennileg tillaga hjá unnustunni. Ekki myndi ég nenna að standa í þessu þó hugmyndin sé vissulega skemmtileg og frumleg. Þetta er samt frábær lausn fyrir fólk sem hugnast ekki að axla neina ábyrgð. Meðvitaðar aðgerðir til að sleppa billega frá daglegu amstri. Stundum er þægilegt að láta hugsa algerlega um sig. Í fornsögunum nefndust slíkir menn kolbítar. Þeir risu þó ávallt úr öskustó að lokum, slepptu pilsfaldi móður sinnar og gerðust allra manna gjörvulegastir. Ég spá því að eins sé farið með þessa ágætu gotnesku unglingsstúlku. Þegar hún þroskast aðeins á hún eftir að sleppa ólinni. Sú spurning sem brennur mest á vörum mínum er þó hvort hún hringi sig til fóta eigandans á næturnar?
mbl.is Gota með kærustuna í bandi vísað úr strætó
Tilkynna um óviðeigandi tengingu við frétt

Alvöru Pólstjarna

Nútíma borgarísjakiÞetta hefur verið hressandi sigling yfir Atlantshafið. Siglandi kókaínfjall sem hefði nánast getað sökkt Titanic hefði þau skip mæst í myrkri.

Þess má til gamans geta að götuvirði þessa magns hér á landi er kr. 9,000,000,000,eða níu milljarðar króna. Þá er um óblandaðan skammt að ræða. Segjum að efnið sé drýgt í hlutföllunum 1:3 þá er talan komin í 21 milljarð. Mikill er vímuþorsti mannkyns.


mbl.is Fundu 600 kg af kókaíni
Tilkynna um óviðeigandi tengingu við frétt

Að græða aukatíma

Nú er gríðarlegt tækifæri í augsýn. Tækifæri sem ekki kemur aftur fyrr en eftir fjögur ár.

Málið er nefninlega að nú er nýhafið hlaupaár. Það þýðir að við fáum heilar tuttuguogfjórar klukkustundir aukalega þetta árið beint upp í hendurnar. Þetta er auðvitað mikil kjarabót, sérstaklega fyrir jafn vinnuglaða þjóð og Íslendinga. Það má því búast við feitari tékka eftir þennan langa febrúarmánuð en síðustu ár.

TímamælirHvað á maður að gera við svona aukatíma ef maður er ekki vinnufíkill? Spurning hvort maður eyði honum í góðgerðarstarfsemi eða hreinlega dekri við sjálfan sig?

Það er nú einu sinni svo að margt er hægt að afreka á einum sólarhring. Þetta jafngildir tveimur tímum á hverjum mánuði ársin. Hálftíma á viku. Hvað er hægt að gera sniðugt á hálftíma sem við fáum alveg gefins?

Ég er að hugsa um að eyða þessum tíma í konuna mína en er veikur á svellinu. Hugsanlega fer þessi vikulegi hálftími bara í einhverja vitleysu. Eins og að skrifa tilgangslausa bloggfærslu. 


Þá fer þetta að skella á og stutt í áramót

Chevy Chase upplýsturEr að fara að demba mér í 10 ára hefð. Að horfa á National Lampoon's Christmas Vacation á aðfaranótt tuttugastaogfjórða. Það er bara eitthvað við þessa mynd sem kemur mér í jólaskapið. Rölti smá Laugaveg í kvöld. Ótrúleg mannmergð. Varla hægt að komast áfram.

Svo er það vinna í fyrramálið kl. 9 stundvíslega. Einn af fáum dögum sem maður lætur sig hafa það að mæta í jakkafötum. Ég á erfitt með að skilja þá pólitík á sumum vinnustöðum þar sem jakkafatabrúkun er skylda. Finnst það óttalega 20. aldarlegt.

 

 

 

 

Bið annars að heilsa öllum og vona að þið hafið það gott. Munið að slappa af, það vill gleymast. Verum hress og ...

 

 

...gleðileg bítlajól... 


Þykir nú bara nokkuð gott

drunk teenagerVeit ekki með ykkur en það að aðeins 5% gesta sé undir lögaldri á barnum þótti nú bara frekar lítið í mínu ungdæmi. Finnst mér virðingarvert að starfsmenn Tropical hafi þetta góð tök á því að passa upp á aldurstakmarkið. Ég hef lúmskan grun um að mun stærra hlutfall sé af ólögráða ungmennum á mörgum börum miðbæjarins. Vona ég að eigendur Tropical hljóti sérstaka viðurkenningu lögreglu fyrir afar vel unnin störf.
mbl.is Unglingadrykkja á Tropical
Tilkynna um óviðeigandi tengingu við frétt

Maður spyr sig...

...af hverju munntóbak var tekið af markaði hér á landi fyrst það er hættuminna en tóbaksreykingar? gómsætir munngátspúðarÉg hef heyrt því fleygt að í kjölfar reykingabanns á skemmtistöðum séu jafnvel dannaðar dömur farnar að fylla skoltinn af tóbakspúðum til að þurfa ekki að hírast undir vegg með rettuna. Smygl á munntóbaki er talsvert og eru dósirnar seldar dýrum dómi á "svarta markaðnum" hér á landi.

Maður veltir því fyrir sér; af hverju var fínkorna tóbak bannað en ekki reyktóbak? Af hverju ekki reyktóbakið frekar og hinu hættuminna haldið . Hvenær ætli öll tóbaksneysla verði bönnuð í landinu?

Hver ætli taki þessar ákvarðanir?


mbl.is Munntóbaki fylgir aukin hætta af völdum hjartaáfalla og heilablóðfalla
Tilkynna um óviðeigandi tengingu við frétt

Trúarleg siðferðisklemma sem setur eilíft líf mitt í hættu

 Nú er ég í blússandi vandræðum!

 

Kona mín elskuleg segir að ég eyði meiri tíma í tölvuna en hana. Þetta er vont að heyra. Ég reyndi að segja henni að Guð leyfi mér ekki að liggja hjá henni meðan hún er á blæðingum! Hún er ekki að kaupa þessa skýringu. Nú stend ég frammi fyrir því að eiga tvo valkosti og "hvárki góðan" eins og segir í eddukvæðum. Lifa helvíti á jörðu undan brennandi augnaráði konu minnar elskulegrar, eða verða kastað í ystu myrkur andlegrar tilveru af réttlátum Guði mínum. Ég spyr því kæru bloggarar; Hvað á ég að gera???


Samt ofnotað lyf

Ég er samt viss um að of mörg börn hér á landi eru sett á þetta lyf. Þessi þjóð virðist sólgin í skyndilausnir af þessu tagi. Lyfjagjöf hér á landi er ótrúlega mikil og erfitt að trúa því að við séum líffræðilega öðruvísi en annað fólk. Ég tek fram að vissulega eru til ofvirk börn sem koma vel út úr lyfjagjöf, en ég held að nauðsynlegt sé að beita atferlismeðferð með til að hámarka árangurinn og jafnvel hjálpa þeim að losna við lyfin fyrr en ella. En er þetta innlend frétt???
mbl.is Segja lyfjagjöf við ofvirkni gagnslausa
Tilkynna um óviðeigandi tengingu við frétt

Furðulegt orð

Enn á ný missa ítalskar bullur sig í ofbeldi. Mér finnst samt furðulegt að fréttamenn skuli kalla þetta "knattspyrnuunnendur". Það er undarleg ást sem brýst út í ofbeldi. Eru þetta þá ástríðuglæpir? Maður spyr sig hvort um raunverulega unnendur knattspyrnu sé að ræða eða bara ofbeldisdýrkun í skjóli kappleikja?
mbl.is Óeirðir brutust út á Ítalíu
Tilkynna um óviðeigandi tengingu við frétt

Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband